Елімізде тұңғыш рет аталып өтіп жатқан Алғыс айту күні Оңтүстік Қазақстан облысында кең көлемде мерекеленді. «Түркістан» сарайында өткен  «Қазақ еліне мың алғыс!» салтанатты іс-шарасы әкімшілік-іскерлік орталығы алаңында ұйымдастырылған облыстық этномәдени бірлестіктердің көрмесін тамашалаудан бастау алды.

Көрмеде өңірдегі 20 этномәдени бірлестіктер өздерінің салт-дәстүрін дәріптейтін ұлттық бұйымдары, тағамдары мен өнерлерін ұсынды.

Ел бірлігін бекемдеумен қатар, тұғырлы татулығымыз бен ырысты ынтымағымызды жаңа белеске жетелейтін бұл салтанатты жиында облыс әкімі сөз сөйлеп, барша жұртшылықты мәні ерекше, маңызы жоғары атаулы күнмен құттықтады.

 «Қазақстанды мекендейтін барша ұлттар мен ұлыстар бір халықты, бір елді құрап, тоғысқан бір тағдырға айналды. Шын мәнінде, Алғыс айту күнін мерекелеу «Мәңгілік Ел» жалпыұлттық патриоттық идеясын, қазақстандық тұрақтылықты ортақ тарихи сана ретінде нығайтудың халықтық құндылықтарын бейнелейді. Бүгінгі таңда Қазақстан әлемге өзін бірлігі бекем, ынтымақты, ырысты ел ретінде танытып отыр»,- деді Оңтүстік Қазақстан облысының әкімі Б.Атамқұлов.

                                        Оңтүстік Қазақстан облыстық Қазақстан халқы Ассамблеясы,

облыс әкімі аппаратының  «Қоғамдық келісім» КММ баспасөз қызметі 

Кейін қарай