Қазақстан халқы Ассамблеясы кеңесінің кеңейтілген отырысында мемлекет басшысы Қасым-Жомарт Тоқаев Аналар кеңестері біздің ұлттық құндылықтарымыз жаңғыртылып, жас ұрпаққа берілетін өзіндік мектепке айналғанын атап өткен болатын.

Панфилов ауданында Қазақстан Республикасы Тәуелсіздігінің 30 жылдығына орай Алматы облысы Қазақстан халқы Ассамблеясы жанындағы Аналар кеңесінің «Мәдениетті ана - мәдениетті ұлт» атты отырысы өтті.

Іс-шара аясында Жаркент Жоғары гуманитарлық-техникалық колледжінің ғимаратында ауданның этномәдени бірлестіктері өкілдерінің қолданбалы өнер бұйымдарынан, ұлттық тағамдардан, музыкалық аспаптардан көрме ұйымдастырылды.

Күн тәртібінде Қазақстан халқы Ассамблеясы Кеңесінің кеңейтілген отырысында берілген тапсырмаларды іске асыру мәселесі тұрды. Отырыс жұмысына аналар және қоғамдық келісім кеңестерінің төрағалары, этномәдени бірлестіктердің өкілдері, медиаторлар, Панфилов ауданының ішкі саясат бөлімінің өкілдері қатысты.

Іс-шара барысында Аналар кеңесінің өкілдері ағымдағы жылы атқарылған жұмыстармен және алдағы жоспарлар туралы айтып берді. Аналар кеңесі Ассамблеяның негізгі құрылымдарының бірі болып табылады және өз қызметін облыстың әрбір елді мекенінде жүзеге асырады.

Сондай –ақ, Медиация, этномедиация институты туралы медиация кабинетінің меңгерушісі, кәсіби медиатор Бақыт Шыңғаева өз баяндамасында егжей-тегжейлі айтып берді. Қоғамдық келісім мен ұлтаралық бірлікті нығайтудағы Медиация - Ассамблея жұмысындағы маңызды бағыт бірі екенін атап өтті.

Іс-шара белсенділерді алғыс хаттармен марапаттаумен және жарқын концерттік бағдарламамен аяқталды.

Кейін қарай