Қызылорда облысы әкімінің орынбасары Серік Ахмет «Қазақстандағы орыс қауымдастығы» ҚБ Қызылорда облыстық филиалының жетекшісі Владимир Толоконниковты мерейлі 75 жасымен құттықтап, Құрмет грамотасын табыс етті.

Владимир Петрович өзінің саналы ғұмырын жалпыұлттық бірлікті, қоғамдық келісім мен этносаралық достықты нығайту жолында аянбай еңбек еткен жан. Медицина саласының дамуына сүбелі үлес қосып, қайырымдылық бағытында да игі жұмыстар атқарып келеді.

Кездесуде сөз алған облыс әкімінің орынбасары Серік Ахмет мерейтой иесінің өз ісіне адалдығымен, жауапкершілігімен атқарған қажырлы қызмет үшін ризашылығын білдірді.

Өз кезегінде мерейтой иесі «Қызылордада менің әкем дүниеге келді. Менің балалық және жастық шағым осында өтті. Мен туған қаламды ерекше бағалаймын. Себебі Сыр өңірі менің мәңгілік мекенім», - дей келе көрсетілген құрмет пен жылы жүздесу үшін риясыз алғысын жеткізді.

Айта кету керек, Владимир Толоконников өңірдегі орыс қауымдастығы құрылған сәттен бастап, 14 жыл қатарынан оған жетекшілік етіп келеді.

Кейін қарай