2016 жылғы 4 ақпан күні  сағ.10.00-де Батыс Қазақстан облысы Орал қаласында (Астана ш/а) Қазақстан халқы Ассамблеясы  Үйінің ғимараты салтанатты  түрде ашылды.

Аталған шараға  Қазақстан халқы Ассамблеясы Төрағасының орынбасары – Қазақстан халқы Ассамблеясы хатшылығының меңгерушісі  Ералы Тоқжанов, Батыс Қазақстан облысының әкімі  Нұрлан Ноғаев, БҚО ҚХА қариялар, аналар кеңестерінің өкілдері, БҚО ҚХА ғылыми-сараптама тобының және журналистер клубының мүшелері, этномәдени бірлестіктердің, облыстық басқармалардың басшылары, үкіметтік емес ұйымдардың өкілдері мен жастар қатысып флешмоб ұйымдастырылды, аспанға бейбітшіліктің символы – ақ көгершіндер ұшырылып, ән мен күйден шашу шашылды.

Қазақстан халқы Ассамблеясы Төрағасының орынбасары – Қазақстан халқы Ассамблеясы хатшылығының меңгерушісі  Ералы Лұқпанұлы Тоқжанов өз сөзінде: «Достық үйлері  Елбасы тапсырмасымен Қазақстанның өңірлерінде салынып, тапсырылды, бүгін сол тапсырма бойынша Орал қаласында Достық үйі  пайдалануға беріліп отыр.  Тұрақтылық пен  бейбітшіліктің мекені – Достық үйі   Елбасы жария еткен Ұлт жоспары  - «100 нақты қадамның» 4-бағытын   жүргізуге арналған  мекеме деп білеміз», - дедi.

Батыс Қазақстан облысында 90-нан астам түрлі этнос өкілдері тұрады және 48 этномәдени бірлестік, соның ішінде облыс орталығында - 17-сі жұмыс істейді.

Жаңа әкімшілік ғимаратта   этномәдени бірлестіктердің 17 кабинеті, БҚО ҚХА жастар қанатының, ардагерлер кеңесінің кабинеттері орналасқан, сонымен қатар  - 150 орындық концерт залы, 80 орындық конференц-зал (26-дөңгелек үстел) бар, медиация кабинеті жасақталып адамдарды қабылдауға дайын.  Бұдан басқа Қазақстан халқы Ассамблеясының Үйінде 2 репетиция (дайындық) кабинеті және 2 хореография залы, тілдерді үйрету бойынша 3 сыныбы (мемлекеттік, ағылшын және ана тілін оқыту), костюмдерді сақтау, гримдеу бөлмелері де көзделген.

Сондай-ақ облыстық Қазақстан халқы Ассамблеясының қызметін қамтамасыз ететін «Қоғамдық келісім» коммуналдық мемлекеттік мекемесінің кабинеттері жұмыс істейді. Жаңа ғимаратта мүмкіндігі шектеулі адамдарға да жағдай жасалған - пандустар, көтергіштер орнатылған, сондай-ақ  соңғы үлгімен жабдықталған дыбыс жазу студиясы, дыбыс режиссерінің, жарық түсіру кабинеттері бар.

Салтанатты ашылу күні шақырылған қонақтардың қатысуымен дөңгелек үстел отырысы өткізілді, сондай-ақ Тәуелсіздік күнінен бастап  уақытты кері санау таймері қосылды, қазақстандық бірегейлікті және  жалпыұлттық бірлікті қалыптастыруға бағытталған «Үлкен ел - үлкен отбасы» жалпыұлттық жобаның шеңберінде «Қайырымдылық керуені» акциясы басталып, іс-шараларға бастау беріліп, іс-шара мерекелік концертпен аяқталды.

 Толқын Нұрқуатова

БҚО әкімі аппаратының «Қоғамдық келісім» КММ баспасөз қызметі

Кейін қарай