Шымкент қаласындағы Достық үйінде Қазақстан халқы Ассамблеясының 30-жылдығына орай «Бірлік пен бейбітшілікке толы 30 жыл» тақырыбында кітап көрмесі ұйымдастырылды. Көрмеде Ассамблеяның қалыптасуы, ішкі саясаттағы рөлі, этносаралық қатынастарды реттеу, көпмәдениетті қоғамда бірлік пен татулықты сақтауға бағытталған шаралар мен жобалар туралы жазылған әдебиеттер ұсынылды.

Іс-шараның мақсаты — Қазақстан халқы Ассамблеясының 30 жылдық тарихи жолын көрсету, этносаралық келісімді нығайту, сондай-ақ, жастарға бірлік пен бейбітшіліктің маңыздылығын түсіндіру болды. Сонымен қатар, көрме Ассамблеяның еліміздің әлеуметтік, мәдени және білім беру салаларындағы ықпалын кеңінен насихаттау мақсатында ұйымдастырылды. Көрмеге қатысушыларға Ассамблеяның мәдени іс-шаралары мен әлеуметтік жобалары жайлы ақпараттар мен басылымдар ұсынылды.

Көрмеге Шымкент қаласының кітапхана қызметкерлері мен мәдениет саласының мамандары, ҚХА жанындағы қоғамдық құрылымдардың өкілдері, «Ассамблея жастары» ұйымының белсенділері, колледж студенттері мен қала тұрғындары қатысты. Қатысушылар көрмеден Қазақстан халқы Ассамблеясының 30 жылдық тарихымен танысып, оның еліміздегі маңызы туралы жаңа мәліметтер алды.

Кейін қарай