Қазақ халқының салт-дәстүрі мен ұлттық қолөнерді және отбасылық құндылықтарды насихаттап көптеген игі істің ұйытқысы бола білген «Хиуаз» әйелдер қоғамдық бірлестігінің құрылғанына – биыл 10 жыл.

Иә, өз қызметін бастағалы бірлестіктің жанынан құрылған «Батыр аналар – ақжаулықты әжелер» ансамблі, «Үлгілі отбасы – өнегелі өмір», «Ене мен келіндер», «Әже мен немерелер» мектебін насихаттап, бала тәрбиесі мен отбасы мәдениетін берік ұстанған Әйел-Аналардың тәлім-тәрбиесі көпке үлгі.

Бүгін аталмыш бірлестік 10 жылдық мерейтойын облыстық Халық шығармашылығы орталығында атап өтті. Мерекелік жиынға Атырау қаласы әкімінің орынбасары Н. Ермұқанов қатысып, «Хиуаз» әйелдер қоғамдық бірлестігінің төрайымы Ш. Әбілқасымқызы мен ұжым мүшелеріне Атырау қаласы әкімінің Алғыс хаты мен естелік сыйлықтарын табыс етті. Сондай-ақ, мерейтойға қатысқан облыстағы мекеме басшылары, ардагерлер, өнер ұжымдары ақжарма тілектерін жаудырып, Әйел-Аналарға зор құрметпен сый-сияпат көрсетті, естелік сыйлықтар ұсынды.

Салтанатты шараға Атырау облысы Қазақстан халқы Ассамблеясының өкілдері, өңірдегі ҚХА Ақсақалдар кеңесінің төрағасы К. Қосыбаев және «Татулық» татар-башқұрт және «Тхониль» кәріс этномәдени бірлестігінің шығармашылық ұжымдары қатысты.

Кейін қарай