Биыл Түпқараған ауданының құрылғанына 25 жыл толды. Осы мерекемен қатар, Маңғыстауда алғаш ашылған Тарас Григорьевич Шевченко атындағы мұражайға 85 жыл толды. Бұл мейрам Форт-Шевченко қаласында үлкен салтанатпен аталып өтілді.

Мерекелік іс-шараға облыс әкімінің орынбасары М.Н. Сқақов, Қазақстандағы украин диаспорасының өкілдері, Т.Г. Шевченко атындағы украин этномәдени бірлестігінің мүшелері, шығармашылық топ өкілдері,  Маңғыстау облысы Қазақстан халқы ассамблеясының мүшелері қатысты.

Мақсат – екі ел арасындағы достық көпірді нығайту.

Түпқараған ауданының әкімі А.Т. Тыйылұлы бастаған топ мерейтойға арнайы шақырылған меймандарды ыстық ықыласпен қарсы алып, ұлттық сусын - шұбат пен бауырсағынан дәм татқызды. Кейін қонақтар мұражай кешеніне барып, Тарас ақынның ескерткішіне гүл шоқтары қойылды.

Іс-шара барысында Тарас өлеңдері қазақ, орыс, украин халықтарының тілінде оқылып, мұражай қоры ақынның кітаптарымен толықты. Қазақстан Республикасындағы Украина елшілігінің бірінші хатшысы Коваль Владимир Михайлович ақын өмірі мен шығармашылығын қазақ-орыс тілдерінде оқығысы келетін оқырман үшін аудандық орталық кітапхана қорына да кітаптар табыстады.

Сондай-ақ, арнайы қонақтардың құрметіне «Достықта жоқ шекара» атты концерттік бағдарлама ұсынылып, украин этномәдени бірлестігі украин халқы атынан мұражай кешенінде қызмет еткен бір топ азаматтарға және аудан басшылығына ілтипатты алғыстарын білдірді.

- Бүгін бізде үлкен мереке. Тарас Григорьевич Шевченко атындағы мұражай ашылғанына 85 жыл болды. Жақында ғана 80 жылдығын тойлаған едік, арада, міне, 5 жыл өтіпті. Бұл музейдің біздің ұрпағымыз үшін маңызы зор. Осындай ұлы есімдердің сақталуына, өнеге болып қалуына өз үлестерін қосқан азаматтардың барлығына алғысым шексіз. Бұл мерекеге жан-жақтан қонақтар келуде. Барлығы да қазақ халқының даналығына тәнті болып, алғыстарын білдіруде. Екі ел арасындағы ең құнды дүние – достық екені сөзсіз, - дейді Т.Г. Шевченко атындағы украин этномәдени бірлестігінің төрайымы Т.С. Лесниченко.

Дата события ассамблеи: 16.10.2017

Кейін қарай