Іс-шара өңір басшысы Марат Сұлтанғазиевтің төрағалығымен өткізілді. Ұйымдастырушы - Алматы облысының «Қоғамдық келісім және даму орталығы» КММ.

Сессия барысында қатысушылар Мемлекет Басшысы Қасым-Жомарт Тоқаевтың Қазақстан халқы Ассамблеясының «Бірлік. Жасампаздық. Өрлеу» атты ХХХІІІ сессиясының отырысында берілген тапсырмаларын талқылады.

2023 жылдың І жартыжылдығында облыстық Ассамблеяның қамқорлығымен этносаралық келісімді нығайтуға бағытталған 200-ден астам іс-шара өткізілгені атап өтілді.

«Облыстық ҚХА қызметі алдағы уақытта да бейбітшілікті, достық пен жақсылықты нығайтуға бағытталатынына сенімдімін. Біздің аймақ бірлік пен қоғамдық келісімнің үлгісі болып қала береді. "Жүректен-жүрекке" акциясы аясында су тасқынынан зардап шеккендерге шамамен 60 миллион теңгеге материалдық көмек көрсетілді, 4 фура және 3 вагон гуманитарлық көмек жіберілді. Көп балалы және аз қамтылған отбасыларға, ардагерлер мен мүгедек балаларға 23 миллион теңге көлемінде көмек көрсетілді», - деп атап өтті Марат Сұлтанғазиев.

Бүгінгі таңда облыстық ҚХА жанынан 1176 адамды біріктіретін 141 ақсақалдар кеңесі және 1200 адамнан тұратын 146 Аналар кеңесі жұмыс істейді.

Жалпы Алматы облысында 105 этнос өкілдері тұрады, 26 этномәдени бірлестік жұмыс істейді.

Кейін қарай