Өскемен қаласы Достық үйі – Қоғамдық келісім орталығының ұйымдастыруымен орыстың ұлы ақыны Александр Пушкиннің шығармашылығына арналған әдеби кеш өтті.

Орыс этномәдени орталығының мұрындық болуымен өткізілген шарада өнерпаздар ақынның ертегілері мен лирикалық өлеңдерінен үзінділерді оқыды.

- Ұлы ақынның қалдырған мұрасы өте бай. Ол түрлі тақырыптарға қалам тербеп, түрлі жанрда жазған біртуар азамат. Әдеби кешті ұйымдастырудағы мақсатымыз, жас ұрпаққа Пушкин шығармаларын насихаттап, ақын рухына тағзым ету, - дейді Орыс этномәдени орталығының төрайымы Вера Правдина.

Кештің ажарын балет мектебінің бишілері түрлендіре түсті. Олар классикалық музыкаға мың бұрала билеп, ақын заманындағы мәдениеттен сыр шертті.

- Біз орыс этномәдени орталығымен тығыз байланыс орнатып, өзара ынтымақтастық қарым-қатынастамыз. Әрдайым бірлесіп, рухани мұраны дәріптеу жолында іс-шаралар ұйымдастырып тұрамыз. Бүгінгі әдеби кеш жоғары дәрежеде ұйымдастырылды. Барлық қатысушыларға алғыс білдіріп, шығармашылық табыс тілеймін ,-деді Өскемендегі Ресей Бас консулдығының вице-консулы Николай Тищенко.

Айта кету керек, аталған әдеби кеш жыл сайын ұйымдастырылып, дәстүрге айналған.

Кейін қарай