21 ақпан – Халықаралық ана тілі күніне орай Қызылорда қаласының Достық үйінің мәжіліс залында «Поэзия және Мен» атты әдеби кеші өтті.

Кеш мақсаты – жастарды мемлекеттік тіл – қазақ тілін біліп, оқып-үйренуге және көздің қарашығындай сақтауға, сонымен қатар, өз ана тілдерін, ұлттық дәстүрлері мен мәдениетін құрметтей білуге шақыру.

Әдеби кештің алғы сөзі Қызылорда облысының ішкі саясат басқармасының «Қоғамдық келісім» КММ директоры Болатбек Айтбенбетовке берілді. Б. Айтбенбетов кеш қонақтарын халықаралық ана тілі күнімен құттықтап, барлық қатысушыларға сәттілік тіледі.

Кеш шымылдығын М. Мәметова атындағы Қызылорда педагогикалық жоғары колледжінің студенті Өмірзақ Дидар өз шығармашылығындағы «Ана тіл» өлеңімен ашты.

Әдеби кешке «Славяне», неміс, кәріс, өзбек, татар, түрік этномәдени бірлестіктерінің белсенділері, отбасылық үлгідегі «Атамекен» балалар ауылының оқушылары қатысып, ана тілдерінде түрлі тақырыптарда мәнерлеп өлеңдер оқыды.

Кеш соңында барлық қатысушыларға Сырдың сыршыл ақындарының кітаптары табысталды.

Кейін қарай