8 наурыз – Халықаралық әйелдер күнінде адамзаттың әдемі жартысын құрметтеумен қатар, әйелдердің әртүрлі қызмет салаларындағы жетістіктері міндетті түрде атап өтіледі. Бұл күн көктем, әйел сұлулығы, нәзіктік, ақыл даналығы және әйелдерге көңіл бөлу күні болып саналадыү

Халықаралық әйелдер күні қарсаңында Қызылорда облыстық Қазақстан халқы Ассамблеясы жанындағы Аналар кеңесінің ұйымдастыруымен «Шұғылалы көктем шуағы» атты әйелдер қауымы өкілдерінің мерекелік қабылдауын өткізілді.

Іс-шараның модераторы облыстық Аналар кеңесінің төрайымы Рахима Ахметова болды. Облыстық ішкі саясат басқармасының «Қоғамдық келісім» КММ директоры Болатбек Айтбенбетов қатысушыларға алғы сөз сөйледі.

Кездесуге облыстық және қалалық мәслихат депутаттары, мемлекеттік мекемелер мен оқу орындарының директорлары, мұғалімдер, дәрігерлер, кәсіпкерлер, этномәдени бірлестіктер басшылары қатарынан 25 әйел қатысты. Іс-шара басталар алдында Қазанғап атындағы жоғары музыкалық колледжінің қазақ ұлттық аспаптар ансамблі әдемі әуендер ойнады. Достық Үйінің фойесінде «Әйелдер – елдің ажары» атты «Тәуелсіздіктің нәзік келбеті» жобасының қатысушыларының фотопортреттерінің көрмесі ұсынылды. Іс-шара дөңгелек үстел барысында шәй үстінде өтті. Қоғамдағы әйелдердің рөлі, балаларды тәрбиелеу, ұлттық дәстүрлерді, отбасылық құндылықтарды сақтау туралы жан-жақты әңгіме болды.

Облыстық филармония әншісі, Қазақстан Республикасының Мәдениет қайраткері Үміт Медеуова мен облыстық филармонияның әншісі Мақсат Мақұлбеков барлық қатысушыларға әйел, ана туралы әдемі, жанды әндер шырқап, тамаша көңіл-күй сыйлады. Мерекелік қабылдау естелік сыйлықтар мен гүлдер табыстаумен аяқталды.

Кейін қарай