Қызылорда қаласының Достық үйінде Татар этномәдени бірлестігінің ұйымдастыруымен облыстық Қазақстан халқы Ассамблеясының қолдауымен «Татар этносының мәдени күні» болып өтті. Шараға «Қоғамдық келісім» КММ директорының міндетін атқарушы Азамат Мукеев, облыстағы этномәдени бірлестіктің белсенділері, ардагерлер, жастар және БАҚ өкілдері қатысты.

Мәдени күн аясында Достық үйінің фойесінде «Достық үйіне 5 жыл», «Қазақстан халқы Ассамблеясына 25 жыл», «Ұлы Жеңіске 75 жыл», «Сабантой мерекесіне 15 жыл», «Абай Құнанбаевқа 175 жыл», «Татарстан Республикасына 100 жыл» және «ҚР Конститутциясына 25 жыл» атаулы мерекелеріне арналған ерекше көрме ұйымдастырылды.

Татулық пен бірлікті нығайту мақсатында өткізілген шараны «Қоғамдық келісім» КММ директорының міндетін атқарушы Азамат Мукеев ашты. «Тәуелсіздікпен бірге шаңырақ көтерген орталық аталған жылдар ішінде еліміздің өсіп-өркендеуіне өз үлесін қосып келеді. Олардың белсенділері үнемі бас қосып, мәдени салт-дәстүрді жаңғыртуға атсалысып, бабадан қалған бай мұраларын сақтап қалуға барын салуда. Бастысы, олар бірлік пен бейбіт күндердің қадірін терең ұғынған. Сондықтан да өңірдегі ынтымақтың ұйытқысы болған облыстық Қазақстан халқы Ассамблеясына олардың алғысы шексіз», - дей келе, бірлестіктің мүшелеріне достық пен татулықты берік ету жолында атқарған жұмысы үшін Қазақстан халқы Ассамблеясының 25 жылдық медалін табыстады.

Татар этномәдени бірлестігінің жетекшісі Галия Гизатуллина «Біздің күнделікті жұмысымыздың басты мазмұны қоғамдағы достық пен келісімді нығайту, жалпы рухани адамгершілік құндылықтарды насихаттау, өскелең ұрпақты патриотизм рухында тәрбиелей отырып, ортақ үйіміздің болашағы үшін жоғары жауапкершілікте болу», - деді. Сондай-ақ, өңіріміздің дамуына сүбелі үлесін қосқан татар этносының мүшелеріне облыстық Қазақстан халқы Ассамблеясы хатшылығының меңгерушісі Жағыпар Тажмахановтың Алғыс хатын табыстады.

Мәдени күн аясында тыл ардагерлеріне Татарстан Республикасының Президенті Рустам Миннихановтың құттықтау хаттары да табыс етілді.

Шарада әртүрлі жанрларда ән, би, өлеңдер орындалды. «Жасмин» би тобының өнерпаздары әскердегі күндерді еске түсіретін «Көк орамал» биін орындады. «Сарман» вокалдық тобы мен солистер түрлі тілде өлеңдер оқып, Ұлы ақын Абай Құнанбаевтың әндерін шырқады.

Кейін қарай