2025 жылғы 19 маусымда Қызылорда қаласында Қазақстан халқы Ассамблеясының 30 жылдығы және Бұқаралық ақпарат құралдары қызметкерлерінің кәсіби мерекесі аясында «TWO STARS» (Екі жұлдыз) атты ерекше ән-шоу байқауы өтті.

Шараны Қызылорда облыстық ҚХА Журналистер клубы алғаш рет ұйымдастырды.

Іс-шараға ҚХА мүшелері, өңірлік БАҚ өкілдері, шығармашыл жастар мен этномәдени бірлестіктердің мүшелері қатысты.

Байқау екі кезеңнен тұрды: алғашқы бөлімде қатысушы жұптар «бірлік», «достық», «татулық» тақырыптарында ән орындап, бейнеролик арқылы өз идеясын ұсынды. Екінші кезеңде еркін форматтағы сахналық қойылымдар мен әндер ұсынылып, көрермендердің зор қошеметіне ие болды.

Конкурстық бағдарламаның нәтижесінде бас жүлде – «Qyzylorda» телеарнасының жаңалықтар жүргізушісі Т. Айымбетов пен бағдарламалар бөлімінің тілшісі А.Саруарбекке, «Ақмешіт жастары» газетінің бас редакторы А. Жолтерек пен «Qyzylorda-news.kz» агенттігінің видео-контент шебері Қ. Мұстафаевқа, екінші орын – «Qyzylorda» телеарнасының сарапшы редакторы Д. Ақайдаров пен жүргізуші-редакторы Ә. Нажмадинқызына бұйырды. Арнайы жүлделер «Өңірлік коммуникациялар қызметінің» қызметкерлері Д. Рахман мен Ж. Төребекова және «Кызылординские вести» газетінің тілшілері Е. Ақынов пен А. Гавычеваға табысталды.

Іс-шараның шарықтау шегінде барлық жұп бірігіп «Екі жұлдыз» әнін орындап, байқау салтанатты фейерверкпен қорытындыланды.

Кейін қарай