ҚХА Маңғыстау облыстық хатшылығы мен Маңғыстау облысы әкімі аппаратының «Қоғамдық келісім» коммуналдық мемлекеттік мекемесі Жеңістің 70 жылдығына орай, «Көк орамал» мерекелік концерт-акциясын өткізді. Мақсаты - жастардың бойында отансүйгіштік құндылықтарды қалыптастырып, соғыс ардагерлерінің әл-ауқатын жақсарту және мемлекет игілігі үшін әлеуметтік маңызды шараларға жас ұрпақтың күш-қайратын жұмылдыру. Шараның міндеті: жастар арасында бейбітшілік пен бірлікті дәріптеп, олардың бойларына аға буынға құрмет сезімін сіңіру; қазақстандық Отан қорғаушыларымыздың жанқиярлық өшпес ерлігін мәңгілік есте сақтау. Шараға ҰОС ардагерлері, этномәдени бірлестіктердің төрағалары мен жастар, мемлекеттік қызметшілер, оқушылар мен студенттер, жастар ұйымдарының белсенділері қатысты. Концерт аясында облыс әкімінің орынбасары Нұрғазиева Бану Ғаниқызы сөз сөйлеп, жұртшылықты Жеңістің 70 жылдығымен құттықтап, жүрекжарды тілегін арнады. Бағдарлама барысында этномәдени бірлестік басшылары әр ардагерге түрлі сыйлық табыс етті. Сонымен қатар, су тасқынынан зардап шеккен қарағандылықтарға қол ұшын созған этномәдени бірлестіктер өкілдері  де марапатталды.

Кейін қарай