Алғыс айту күніне орай, Түркістанда облыстық қоғамдық даму басқармасы мен «Жасыл ел» жастар еңбек жасақтарының ұйымдастыруымен «Достық» аллеясына ағаш отырғызу шарасы өтті.

Игі шараға облыстық қоғамдық даму басқармасының қызметкерлері, «Қоғамдық келісім» КММ және «Ассамблея жастары» РҚБ, жастар ұйымдардың басшылары, еріктілер, БАҚ өкілдері қатысты.

Әуежай маңында орналасқан жасыл белдеу аймағында жалпы 500-ге жуық қарағаш, шырша, т.б. ағаш көшеттері отырғызылды. Осылайша, шараға қатысушылар Президенттің орман алқаптарында 2 млрд. ағаш отырғызу туралы тапсырмасын орындауға өз үлестерін қосты.

Шара барысында «Қоғамдық келісім» КММ басшысының орынбасары Ерназар Баетов Алғыс айту күнінің маңыздылығына тоқталып, қала аумағын тазалау және ағаш отырғызу жұмыстарына шаһар тұрғындарын белсене қатысуға шақырды.

– Алғыс айту күні - жақсылықты бағалай білуге, әр іске жақсылықпен жауап қайтаруға, өзара сыйластық пен құрметке бастайды. Облысымызда осы мерекеге орай онкүндік басталған болатын. Онкүндік аясында қайырымдылық акциялары, суретшілер байқауы, этнос өкілдері арасында қазақ қаламгерлерінің туындыларын мемлекеттік тілде орындау байқауы өткізілді. Бүгінгі ағаш отырғызу шарасының да маңызы ерекше. Біз әрдайым сүйікті қаламыздың таза да жасыл болуына өз үлесімізді қосуды азаматтық ұстанымымыз деп қабылдаймыз, - деді ол.

Айта кетейік, биыл жоспарға сәйкес, қала аумағында 200 мыңнан аса ағаш егу жоспарланған. Қазіргі таңда, климатқа бейімді интродуцияланған ағаш көшеттері – айлант, қарағаш, боз арша, акация егілуде. Сонымен бірге, күл ағаш, үйеңкі, жиде, ива ағаштары да шаһардың жасыл желегін көркейтеді.

Кейін қарай