Елордалық Достық үйінде Қазақстан халқы Ассамблеясының ұйымдастыруымен «Мектепке жол» қайырымдылық акциясы болып өтті.

Акцияның негізгі мақсаты – әлеуметтік қолдауға мұқтаж көп балалы отбасылардан шыққан, сондай-ақ жетім балалар мен ата-анасының қамқорлығынсыз қалған балаларға жаңа оқу жылына дайындық алдында қолдау және көмек қолын созу.

Іс-шараға Астана қаласы әкімінің орынбасары Е.Байкен, Қазақстан халқы Ассамблеясы Хатшылығының өкілдері, этномәдени бірлестіктердің мүшелері мен жастар қанаты қатысты.

Елордалық этномәдени бірлестіктер мен Аналар кеңесінің және ҚХА «Жомарт жан» орталығының қолдауымен өткен іс-шара барысында 200-ден астам бала мектеп сөмкелерімен және оқу құралдарымен қамтамасыз етілді. Көмектің жалпы сомасы шамамен 4 млн теңгені құрайды.

Сонымен қатар ұйымдастырушылар балалардың назарына қызықты ойын-сауық бағдарламасын ұсынды.

ҚХА-ның бұл қайырымдылық акциясы жылсайын этномәдени орталықтардың қолдауымен еліміздің барлық өңірлерінде өтеді.

Жыл басынан бері Астана қалалық Ассамблея мүшелері көрсеткен қайырымдылық және гуманитарлық көмектің жалпы сомасы шамамен 49,5 млн теңгені құрайды.

Кейін қарай