Атырау облысы Қазақстан халқы ассамблеясы сәуір айының 20-сы мен 30-ы аралығында жарияланған балалар арасындағы сурет байқауының жеңімпаздарын анықтап, оларды марапаттау рәсімін өткізді. Шара 1 мамыр - Қазақстан халқының бірлігі күніне орай ұйымдастырылды.

«Онлайн суреттер» байқауына 6 мен 16 жас аралығындағы Атырау облысының 80-нен астам жас суретшілері қатысты. Олардың қатарында Құрманғазы, Жылыой, Махамбет, Индер, Мақат, Исатай аудандарының өкілдері де бар.

Байқауға қатысушылар 1-мамыр мерекесі - ұлттар бірлігі, елдегі бейбітшілік пен ынтымақтастық тақырыбында қиялдарын самғатып, өнерлерін ортаға салды.

Атырау облысы «Аналар кеңесі», ҚХА қоғамдық келісім кеңесінің мүшелері келген жұмыстарды қорытындылап, үздік жұмыстарды анықтады. Қазылар алқасының шешімімен 1-ші орынды Құрманғазы ауданындағы Ю. Гагарин орта мектебінің 5 сынып оқушысы Айкөркем Жәнібекқызы мен қалалық 38 мектеп оқушысы Томирис Ақжігітова өзара бөлісті. Екінші орын иегерлері 11 жасар Шынар Елеубай және Мунира Абдулхамидоваға, ал ІІІ орынды Дильназ Жолдасова, Кәусәр Рысжан және Кәусәр Тоқтамыс ( Исатай ауданының Тұщықұдық ауылы ) иеленді. Ұйымдастырушылар атынан барлық жеңімпаздар ақшалай сыйлықпен марапатталдыТағы 30 қатысушы Алғыс хатпен марапатталды.

Бірлік мерекесі күні Атырау облысы Қазақстан халқы ассамблеясының жастары «Біз - біртұтас Қазақстан халықпыз!» атты акциясын ұйымдастырды. Пандемия кезінде көмекке мұқтаж жандарға азық-түлік себеттерін тарату қайырымдылық шарасын өткізу мақсатында «Достық» үйінде бас қосқан белсенді жастар аспанға түрлі-түсті бейбітшілік шарларын ұшырып, мерекенің сәнін келтірді.

«Жерлестеріне мерекелік көңіл-күй сыйлау мақсатында ашық аспанға күн мен бейбітшіліктің нышаны ретінде түрлі-түсті шарларды ұшырып, алда қуанышты күндердің көп болатындығын еске салды», - дейді грузин этномәдени бірлестігі жастар қанатының жетекшісі Лики Кучухидзе.

Кейін қарай