Ағымдағы жылдың 25 ақпанында Атыраудағы «Довира» украин этномәдени бірлестігінің құрылғанына 19 жыл толады. Осы жылдар ішінде көптеген ауқымды шаралар атқарған бірлестіктің басты бағыттарының бірі – қайырымдылық жасау.

Жыл сайын өңірде қамқорлыққа зәру жандар үшін іс-шаралар өткізуді дәстүрге айналдырған «Довира» украин этномәдени бірлестігі биылғы Жаңа жылды да қайырымдылық шарасымен бастап, 2 ақпан күні Атырау облысының белгілі тұрағы жоқ адамдарға арналған әлеуметтік бейімдеу орталығында болып қайтты.

Концерттік бағдарлама дайындап, қамкөңіл жандарға азық-түлікпен, киім-кешекпен көмектескен этномәдени бірлестік мүшелері сонымен қатар бүлдіршіндерге ойыншықтар, ересектерге оқулықтарды да сыйға тарту етті.

«Осындай көмекке зәру жандарға аз ғана көңіл бөлсек, жақсылық жасасақ, соған қуанамыз. Олардың жүздерінен жылылық пен қуаныш көру бізге сенімділік ұялатады. Сондықтан, барша атыраулықтарды Еріктілер жылында қайырымды істермен айналысуға шақырамыз», - деді бірлестік төрағасы Виктория Синицына.

Кейін қарай