2023 жылғы 13 қыркүйек күні Астанадағы Достық үйінде Қазақстан халқы Ассамблеясы активінің Қазақстан Халық партиясының өкілдерімен кездесуі өтті.

Іс-шараға ҚР Парламентінің депутаттары, Қазақстан халқы Ассамблеясының мүшелері, сондай-ақ этномәдени бірлестіктердің басшылары мен Қазақстан Халық партиясының өкілдері қатысты.

Кездесу барысында Қазақстан халқы Ассамблеясы Төрағасының орынбасары М.Әзілханов партия өкілдерін Ассамблеяның ағымдағы қызметі және қоғамдық келісім мен жалпыұлттық бірлікті нығайту бағытындағы жұмыстарымен таныстырды.

Қазақстан халқы Ассамблеясының саяси партиялармен өзара іс-қимылы ҚР Конституциясында белгіленген негізгі қағидаттарды қамтамасыз ете отырып, Қазақстан халқының татулық, келісім және бірлік атмосферасын нығайтуға ықпал етеді.

«Қазақстан Халық партиясы – еліміздің саяси өмірінің белсенді қатысушысы. ҚР Парламенті Мәжілісінің барлық соңғы шақырылымдарында ҚХП фракциясы құрылып, нәтижелі жұмыс көрсетті. Халық партиясы сайлаушыларының ауқымы кең және партия қоғам мүддесін тек Мәжіліс қабырғасында ғана емес, барлық саяси алаңдарда қорғайды», - деп атап өтті М.Әзілханов.

Сонымен қатар, тараптар өзара іс-қимыл және ынтымақтастық жөнінде, атап айтқанда, қазақстандық қоғамда жалпыұлттық бірлік, қоғамдық келісім және үйлесімді этносаралық қатынастар құндылықтарын ілгерілетуге бағытталған бірлескен қоғамдық, мәдени-бұқаралық, шығармашылық, ғылыми-практикалық іс-шаралар өткізу жөніндегі алдағы жұмыс жоспарын айқындады.

Іс-шара соңында Қазақстан халқы Ассамблеясы атынан М. Әзілханов және Қазақстан Халық партиясының төрағасы Е.Ертісбаев өзара ынтымақтастық туралы Меморандумға қол қойды.

Кейін қарай