Бүгін елорда төрінде Қазақстандағы тәжіктердің республикалық этномәдени орталығы қала тұрғындары мен қонақтарына арнап Ұлыстың Ұлы күні – Наурыз мерекесіне орай мерекелік шара өткізді.

Орталық арнайы киіз үй орнатып, ішін қолөнер көрмелерімен безендірді. Сонымен қатар мерекеге орай екі қой мен сиырды арнайы құрбан шалып, қазандарда наурыз көже мен палау, сорпа пісіріп, мерекелік дастархан дайындалып, барлық қатысушылар мен қонақтарға тегін үлестірді.

«Тереңнен тамыр тартатын құндылықтарымыз дәріптелер бұл мейрамды халқымыз қашанда ізгі ниетпен, үкілі үмітпен, ақ жарма тілекпен қарсы алады. Ұлтымыздың Ұлы мейрамы ел тарихының айнымас бір бөлшегі, мәдениетіміз бен дәстүріміздің киелі бастауы екендігі баршамызға аян. Ел халқының ырыс-ынтымағымен іргесі сөгілмес бірлігінің арқасында дәстүрлі мерекемізді дәріптей отырып, бүгін қала тұрғындары мен қонақтарына арнайы орталығымыздың атынан киіз үй тігіп, мал шалып, қазан-қазан палау пісіріп, дастарханнан дәм татқызудамыз. Ұлыстың ұлы күнінде айтылған барлық тілек қабыл болып, жыл басы баршаңызға ырыс-несібе, құт-береке, мол табыс әкелсін. Шаңырақтарыңызға шаттық пен қуаныш, жанұяларыңызға жылылық сыйласын.», - деп атап өтті орталық төрағасы Акбаржан Исмаилов өз құттықтауында.

Айта кетейік, этносаралық келісімді нығайтуға елордалық этномәдени орталық өкілдері де қомақты үлес қосуда.

Кейін қарай