Алматыда 30 қыркүйекте Қазақстан Жазушылар кітапханасында көрнекті жазушы Шерхан Мұртазаның 90 жылдығына орай «Бір кем дүние» атты кітабына талдау өтті.

Іс-шараға танымал қаламгер, дарынды әдебиет сыншысы, Халықаралық «Алаш» сыйлығының лауреаты Әмірхан Меңдеке, халықаралық ЮНЕСКО сыйлығының иегері, ақын Жұмаш Кенебай, «Қоғамдық келісім» РММ бас сарапшысы Жалғас Шыныбеков, Қазақстан Жазушылар кітапханасының меңгерушісі Елена Ағайса және студент жастар қатысты.

Жиын барасында қатысушылар абыз қаламгер Шерхан Мұртазаның «Бір кем дүние» атты туындысын талдап, тұшымды ойларымен бөлісті.

Сонымен қатар Шерхан Мұртазаның басынан өткерген сұрапыл тағдыры туралы, еңбек жолы жайында сыр шертті.

«Тағдырдың талай тауқыметін тартып, бала кезінен ғұмыры сынаққа толы болды. Алайда өмірдің сондай соққыларына төтеп беріп, қаймана халықтың қамы үшін атқарған тынымсыз еңбегімен елдің ыстық ықылссына бөленді. Көп деген таланттарды елге танымал етіп, сүбелі үлесін қосып кетті», - деп түйіндеді Әмірхан Меңдеке.

Қатысушылардың пікірінше аталған ойтолғауда айтылған қоғамның ішкі-сыртқы ахуалы, адамдық, адалдық, рухани байлық, әдебиет пен мәдениет, экономика мен экология, тіл, демография мәселелері жайлы қадау-қадау ойлары әлі де өзектілігін жоғалтқан жоқ.

«Бүгінгі талқылап отырған ойтолғауда Шераға абызымыздың ғұмыр тәжірибесінен түйгендері жазылған, әрі тұнып тұрған өмір философиясы. Өз оқырманына «адалдықтың қазығынан ажырамауға», ұлттық мәдиниет пен әдебиетті, ұлттық мүддені биік қоюға нұсқайды», - деді Ж.Шыныбеков.

Кейін қарай