ҚР Тәуелсіздігінің 25 жылдығы мен 1 – мамыр Қазақстан халқы бірлігі мерекесіне орай,  Ақтау қаласындағы №12  мектептің мұғалімдері  арасында ұлттық киімдердің байқауы өтті. Мерекелік іс-шараға өңірдің этномәдени бірлестіктерінің төрағалары мен МОФ «Нұр Отан» партиясының өкілдері қатысты.  Мектеп директоры Гүлнар Нұрғалиева шараға жиналған меймандарды таныстырып, мерекемен құттықтады. Меймандар қатарында украин этномәдени бірлестігі мен Т.Г. Шевченко атындағы «Смеричка» өнерпаздар тобының мүшесі Людмила Кравченко, «Ала-ТОО» қырғыз этномәдени бірлестігінің өкілі Сүйінбай Жайгибеков пен әзірбайжан этномәдени бірлестігінің мүшесі Назлы Надирова болды.  Ал, мектеп директорының орынбасары Әсел Айжанова – үндінің ұлттық киімі сари киіп, байқауды одан әрі ерекшелендіре түсті.

Халықтар достастығы мен ынтамақ, бірлігінен асқан байлық жоқ. Қазірде, елімізде 130-дан астан ұлт пен ұлыс бар. Бұл біздің елмен өзге ұлт өкілдері арасындағы берік достықтың белгісі – деді мектеп директоры Гүлнар Қуандыққызы

Байқаудың бір ерекшелігі  - мектеп ұстаздары да өзге ұлттың киімдерін киіп, көпшіліктің таңдайын қақтырды. Ұстаздарға байқаудың өтуіне мектеп оқушылары көмектесіпті.  Іс-шарада сайыскерлер ұйғыр, украин, өзбек әндеріне би билеп, жиналғандарды өнерлерімен тамсандырды. Тіпті,  қатысушылар ішіндегі ұстаз апайлардың бірі өзбек халатын киіп, мұрт тағып ер азаматтың рөлін сомдады. Сондай-ақ, қазақ ұлтының мәдениеті, салты  мен дәстүрі таныстырылып, ұлттық тағамдары дайындалды.  Байқауда, украинның «Хуторянка» және де «Пидманула, пидвела» әндері айтылды. Қатысушылар әзірбайжан салты мен дәстүрін насихаттап, сонымен қоса қырғыз, сыған әндері шырқалды, әзіл, қалжыңдары айтылды.

Іс-шара соңында қатысушылар дипломмен марапатталып, әділқазылардың атынан Людмила Кравченко ұйымдастырушыларға алғысын білдірді. 

МОӘА «Қоғамдық келісім»КММ баспасөз қызметі

Кейін қарай