Қазақстан халқы Ассамблеясы

05 Наурыз, 2020

361

«Дервиши» тобының әншісі Ділмұрат Бахаров: «Доссыз өмір бос» әні – Қазақстан халқы достығының гимніне айналса деймін

«Дервиши» тобының әншісі Ділмұрат Бахаров «Доссыз өмір бос» әнін Қазақстан халқының татулығы мен бірлігін дәріптеуге арнағанын айтады. Аталмыш әнді алғаш рет әнші 2019 жылдың қазан айында Алматы қаласында өткен «Дервиши» тобының 20 жылдық мерейтойлық концертінде Майра Мұхамедқызымен бірге орындаған болатын.

«Бұл әуенді қағазға түсіргеніме көп уақыт болған еді. Біз әлемде татулық пен халықтар арасында ынтымақтың болғанын қалаймыз. Сондықтан, әуені бірінші ойға оралғанымен, әннің мазмұнын ұзақ ойландым. Әннің сөзін жазу үшін марқұм Әбдірахман Асылбек ағамызды шақырдым. Достық ұғымының мағынасы тереңде жатыр. Достық тек екі адамның арасындағы сыйластық, көңілжықпастық немесе көршілер арасындағы татулық қана емес, бұл ұлттар арасындағы бір-біріне деген құрмет екенін әнді тыңдаған әрбір адам түсінсе екен деймін.

Біздің елімізде барлық этностардың дамуына жағдай жасалған. Қазақстан халқы Ассамблеясы сол үшін құрылып, жұмыс жасауда.

Бұл ән - ізімізді басып келе жатқан жас ұрпаққа айтылған аманат.

Қордайдағы жағдайдан кейін, мен бұл ән достықтың дәріптеушісі ретінде халық арасында кеңірек таралуы керек деп ойлаймын. Достық бала кезден басталады. Аталарымыз, әкелеріміз көрген қиындықты біз көрген жоқпыз, алайда біз олардың жүріп өткен жолына құрметпен қарауымыз керек. Мен мәселен, ұйғыр ұлтының өкілімін. Алайда, кіндік кескен жерім де, Отаным да Қазақстан. Елім деп соққан жүрегіміздің арманы да ортақ — бейбітшілік пен ынтымақтастық орнаған елде өмір сүру», - дейді әннің шығу тарихын баяндаған Ділмұрат Бахаров.


Кейін қарай