Бүгін «Достық үйінде» Маңғыстау облысы Қазақстан халқы Ассамблеясы мен «Қоғамдық келісім» КММ ұйымдастыруымен қоғамдық бірлестіктер мен ұйымдардың дөңгелек үстелі өтті.

Мақсаты – ҚР Президентінің Үндеуіндегі жариялаған жаңа конституциялық реформаларды талқылау.

Іс-шараға Маңғыстау облысы әкімі аппаратының «Қоғамдық келісім» КММ-сінің басшылығы, этномәдени бірлестік төрағалары, Ауған соғысы ардагерлері, «Нұр Отан» партиясының мүшелері, ҚХА жанындағы «Аналар кеңесінің» мүшелері, «Хазрет» жастар қоғамдық бірлестігі, «Жас Отан» жастар қанаты, «Нұрлы Ақтау» қоғамдық бірлестігі және  т.б. қоғамдық ұйым мүшелері қатысты.

Жиын басында қатысушылар Елбасы Үндеуін тағы бір мәрте тыңдады. Үндеуге қатысты ойларын ортаға салып, пікірлерін жеткізді. Елбасы Үндеуіне бірауыздан қолдау білдірген қатысушылар үкіметті жасақтаудағы Парламенттің рөлін күшейту - оңтайлы шешім екенін айтты. Себебі осылайша министрлер кабинетінің өкілетті билік алдындағы жауапкершілігі артады дейді олар.

 «Елбасымыз әрқашан ел қамы үшін тиімді шешімдер қабылдайды. Билік құзыретін ауыстыруы – бұл жаңа өзгерістер мен  ел игілігі жолындағы ерен еңбек деп білемін. Оған қолдау білдіріп, реформалардың іске асуына атсалысу кез келген Қазақстан азаматының міндеті», - дейді «Жас Отан» жастар қанатының төрағасы Әсет Нұров.

Мемлекет Басшысы өз құзыретіндегі біршама өкілеттіктерді Үкімет пен Парламентке берді. Бұл - жаһандық ахуал мен ғаламдық үдерістерге, технологиялық және әлеуметтік жаңғырту талаптарына берілген нақты жауап. Басты мақсат - басқару жүйесінің тиімділігін барынша арттыру.

Кейін қарай