Еліміздің батыс өңірінде «Көрісу» мейрамы өткен соң ел жыл басы Наурызды қарсы алуға дайындық басталды. Халқымызда жаңа жылды ақ көңілмен бастау дәстүрге айналған. Осы дәстүр бойынша Жамбыл облысындағы этномәдени бірлестіктер айтулы мерекені тойлауға кірісіп те кетті.

Хиязов әулеті әдетте Наурызда көптен күткен қонақтарын қарсы алады. Бұл күні дастарханның сәнін кіргізетін, әрине,  – наурыз көже. Бір қызығы, дүнген халқы аталған асты басқаша әзірлейді. Қазақ халқының наурыз көжесіне қарағанда әлдеқайда қою болып шығады. Өңірдегі татар-башқұрт, өзбек және дүнген этномәдени бірлестіктерінің өкілдері бас қосқан отырыс ән-бимен қызықты өтті.

Көпұлтты ортада жайылған дастарханда дүнгендердің санзы, қазақ елінің бауырсағы мен татарлардың чак-чагы қатар қойылды. Мерекелік үстел басында жиналғандар әр түрлі тілдерде алдағы жылға ізгі тілектерін айтты. Көктемнің келгенін білдіретін Наурыз мерекесі барлығын бір шаңырақтың астына жинайды. Ал бұл Қазақстанда өмір сүретін халықтардың тату болуына септігін тигізері сөзсіз.  

Күн мен түннің теңелу мерекесі әлі алда. Еліміздің түкпір-түкпірінде Наурыз мейрамы дүркіретіп тойланатын болады. Ал қазір бұл бір-бірімен кездесіп, өткен жылда болған оқиғалармен бөлісіп, алдағы жылға ашық аспан пен сәттілік тілеу үшін керемет мүмкіндік. 

Кейін қарай