Көкшетау қалалық қазақ кітапханасында Елбасының «Рухани жаңғыру» бағдарламасы аясында және Қазақстан халқы Ақмола ассамблеясының жанындағы облыстық Аналар кеңесінің «Қыз тәрбиесі ұлт тәрбиесі» жобасын іске асыру мақсатында «Халық қолөнері – халық қазынасы» атты шеберлік сағаты өтті.

Ұйымдастырушылардың ақпаратына сәйкес, іс-шараның басты мақсаты - қазақ халқының мол қолөнер үлгілерімен таныстыра отырып, халық өнерін қастерлеуге, үлгі тұтуға үйрету, қазақтың ежелгі салт-дәстүрлерін сақтай отырып, қолөнерді жетілдіру, болашақ ұрпаққа үйрете отырып, оларды қолөнерге баулу.

Шараға ұлттық өнерді ұлықтап, оны дамыту жолында үлкен еңбек етіп жүрген Ақмола облыстық Қазақстан халқы ассамблеясы жанындағы халықтық-қолданбалы өнер шеберлері одағының және облыстық ҚХА жанындағы Аналар кеңесінің мүшелері, қазақ кітапханасының «Үкілім-ай» қыздар клубының тәрбиеленушілері, кітапхана оқырмандары, жастар қатысты.

Шеберлік сағатында қонағымыздың өз қолынан шыққан қолөнер бұйымдарынан көрме-экспозиция ұйымдастырылды. Шара барысында қолөнер шебері Үкіжан Ементаева қолөнер әр халықтың мәдениетінен сыр шертетін, тамырын тереңнен алатын өнер екенін айта келе, жастар қолөнер сынды асыл мұрамызды ұлттық құндылық ретінде қастерлеп, ұрпақтан ұрпаққа жеткізуі керектігін алға тартты.

Сондай-ақ Үкіжан апамыздың қолынан шыққан «Ұлы түркі қағанаты», «Қазақ даласындағы ежелгі қалалар» сынды матаға түсірілген карта, «Руна жазуы» тағы басқа тарихтан сыр шертетін бұйымдарды жасау қажырлы еңбек пен білімді талап еткені көрініп тұрды.

Сонымен қатар «Ұлы даланың жеті қыры» мақаласымен үндесетін «Алтын адам», «Аң стилі», «Атқа міну мәдениеті» бейнеленген қолөнер туындылары көпшіліктің қызығушылығын тудырды. Үкіжан апайдың әр туындысы ерекше отаншылдық сезімді, ұрпаққа деген ізгі үмітті әйгілеп тұрғандай әсер қалдырады.

Жүннен түрлі бұйымдар жасайтын Гүлнар Мырзағалиқызы қазақтың қолөнерін жаңғыртып, қойдың жүнінен жұқа киіз жасап, оған түрлі ою өрнектер салып, заманауи жастардың сұранысына сай киім жасаудың жолдарымен бөлісті.

Жиналған жастар шеберлік сағатында өз қолдарымен киізден бұйым жасап көруге мүмкіндік алды. Гүлнар Мырзағалиқызы үйнеруге ықылас танытқан жастарға әрқашан үйретуге әзір екенін жеткізді.

Кейін қарай