Ассамблея түркітілдес елдер арасындағы ынтымақтастықты жоғары бағалайды, өйткені түркі халықтарын ортақ тарих, мәдениет және тіл біріктіреді. ҚХА құрылған сәттен бастап түркітілдес этностар ынтымақтастығын кеңейту және дамыту бойынша елеулі, жемісті жұмыстар атқарылды. Өз сөзінде Мемлекет басшысы Қазақстан халқы Ассамблеясының «Әділетті Қазақстан: бірлік, тұрақтылық, даму» атты ХХХІІ сессиясында «Ұлы Абай «Еш қазақ қырғыз бен қазақтың бір тұқымдас екеніне таласпайды» деген. Алатаудың бөктерін қатар жайлаған егіз халық болашаққа бірге қадам баса береді. Біз басқа да бауырлас елдермен, көрші мемлекеттермен қарым-қатынасты осындай деңгейде жалғастыруымыз керек», - деп атап өтті.

Тарихы да, тағдыры да, танымы да ұқсас осы екі ұлтқа ортақ дүние аз емес. Шері мен шежіресі қатар өрілген туысқан халықтардың рухани байлықтарын ғана емес, ұлттық мүдделер тұрғысында да байланыстыратын тұстары өте көп. Жалпы алғанда, қазақ және қырғыз халқының мәдени саладағы қарым-қатынасы жан-жақтылығымен ерекшеленеді.

Жоғарыда аталған ұлттық құндылықтарды негізге ала отырып, Ассамблея Қазақстан халқының ұлттық мәдениеттері, тілдері мен дәстүрлерінің өркендеуіне, сақталуына, және дамуына бағытталған жұмысын жалғастыруда. Айқын мысалы ретінде Алматы қаласы республикалық Достық үйінің және “Мурас” қырғыз этномәдени орталығының ұйымдастыруымен өткен «Манас – қазақ, қырғыз жыршылық өнерінің алтын арқауы» атты шығармашылық кешті келтіруге болады. Аталған іс-шараға қазақ және қырғыз зиялы қауым өкілдері мен қабырғалы қаламгерлері, белгілі манасшылар қатысты. Атап айтқанда, «Манас» жырын 124 сағат оқып, Гиннес рекордын орнатқан белгілі манасшы Рысбай Исаков, «Башканы коюп, Манасты айт» атты конкурстың жеңімпазы, жас манасшы Нурбек Талантбеков, Қырғызстан Республикасының Алматы қаласындағы Бас консулы Назарали Арипов қатысты.

Бұл іс-шараның негізгі мақсаты өскелең ұрпаққа асыл жырлар мен термелерді насихаттау, бауырлас екі мемлекет арасындағы мәдени байланысты нығайтуға бағытталған.

Кейін қарай