Көкшетау қаласының іргесінде орналасқан Станционный поселкісіндегі қалалық кітапханада 15 мамыр халықаралық Отбасы күні қарсаңында ауылдағы мерейлі отбасын ұлықтау мерекесін өткізу дәстүрге айналған. Бұл жолы «Баланың бас ұстазы – ата-ана» атты іс-шара Ақмола облысы Қазақстан халқы Ассамблеясы жанындағы «Аналар кеңесінің» қолдауымен, Станционный қалалық кітапханасының ұйымдастырумен өтті. Аналар кеңесінің төрайымы Зере Қиықова жиналған қауымды сүйіспеншіліктің, құрмет пен ынтымақтастықтың ошағы – Отбасы күнімен құттықтап, игі тілектерін жолдады. Сондай ақ «Аналар кеңесінің» мүшесі Суховецкая Людмила және Дегоян Рузанна өз кезектерінде іс-шараға қатысқан көп балалы және жас отбасыларды атаулы күнмен құттықтап, жылы лебіздерін білдірді.

 Мереке қарсаңында ұлықталған мерейлі отбасылардың бірі -Жақыповтар отбасы 10 бала тәрбиелеп отырған үлгі тұтарлық отбасы, өздерінің бала тәрбиесіндегі тәжірибелерімен және ақыл-кеңестерімен бөлісті. Сонымен қатар 5 бала тәрбиелеп отырған Патрушевтар отбасы да  әрдайым кітапханада өтетін іс-шараларға белсене қатысып, өздерінің өнерімен көпшілікті тамсандырып келеді.

Қазақстан халқы Ассамблеясының мүшесі, «Қазақ тілі мен мәдениеті» қоғамдық бірлестігінің төрағасы Мейрамбек Қиықұлы өз сөзінде жиналғандарға Елбасы Нұрсұлтан Назарбаевтың мемлекет отбасыдан басталатындығын, сол себепті де біздің қоғамдағы отбасылық құндылықтарды нығайтудың маңызы зор екендігін еске сала кетті.  Аналар кеңесінің мүшесі, чуваш тілінің мұғалімі, қолөнер шебері Тарасова Елена жиналған қауымды өзінің туындыларымен таныстырып, шеберлік сабағын өткізді.

Аталған екі отбасы кітапхананың тұрақты оқырмандары ретінде «Кітап оқитын отбасы» дипломдарымен марапатталған болатын. Бұл мерекеде  де Ақмола облысы Қазақстан халқы Ассамблеясының хатшылығы Жақыповтар мен Патрушевтарға құнды сыйлықтар табыс етсе,  Станционный кітапханасының  меңгерушісі Валентина Грошиковаға отбасылық оқуды насихаттап жүргені үшін алғыс хат табысталды.  Іс-шараға қатысқан Қазақстан халқы Ақмола ассамблеясы жанынан құрылған этномәдени орталық және  «Аналар кеңесінің» мүшелері, оқушылар, ұстаздар, мәдениет қызметкерлері, кітапхана оқырмандары отбасы құндылықтары мен көп балалы отбасы болуды насихаттайтын  бұл іс-шарадан мол ақпарат, жағымды әсер алып қайтты.

Өз кезегінде кітапхана басшылығы мерейлі отбасын насихаттайтын іс- шаралар мұнымен тоқтап қалмайтындығын жеткізді. 

«Қоғамдық келісім» КММ

баспасөз орталығы

Кейін қарай