Тараз қаласының Достық үйінде Қазақстан халқы Ассамблеясының 25 жылдығы және ҚР Тұңғыш Президенті күніне орай, Жамбыл облыстық Махмұт Қашқари атындағы ұйғыр этномәдени бірлестігінің ұйымдастыруымен ашық есік күні өтті.

Іс-шара жастарға ұйғыр этносының шағын мұражайы мен кітапханасына саяхат жасаумен басталды. Ұйғыр этномәдени бірлестігінің басшысы Мухабат Абдрахманқызы түркі ғалымы Махмуд Қашқаридың өмірбаяны және күллі әлемге белгілі «Диуани-лұғат ат-түрік» енбегінен хабардар етті.

Сонымен бірге, ҚХА-ның 25 жылдығына арналған дәрістер оқылып, «Жанғыру жолы» жастар қозғалысының «Қазақ тiлiмiз - ортақ тiл» тақырыбында баяндамалар жасалды.

Мухабат Абдрахманқызы кездесу барысында облыстық ҚХА-ның «Жаңғыру жолы» жастар қозғалысы өкілдерін алғыс хаттармен марапаттады.

- Биыл ел бірлігін бекемдеп отырған Қазақстан халқы Ассамблеясына 25 жыл толып отыр. Облысымыздағы барлық этностардың, оның ішінде ұйғыр этносының шығу тегін, оның салт-дәстүр, тарихи әдет-ғұрыптарын және мемлекетіміздегі өмір сүру салтын, өскелең жас ұрпаққа үйретіп отыру, халықты татулыққа шақыру, жастарымызға бейбітшілігімізді қастерлетіп үйрету - біздің басты міндетіміз, - дейді орталық жетекшісі.

Жиын соңында Жамбыл облыстық «Қоғамдық келісім» КММ басшысы Рано Убайдуллаева жастарды тұңғыш Президент күнімен құттықтады.

Кейін қарай