Қызылорда облыстық Қазақстан халқы ассамблеясының ұйымдастыруымен «Атамекен» балалар ауылында «NEXT ЧЕМПИОНМЫН» спорттық шарасы өтті.

Оған облыстық ҚХА мүшелері, облыстық ҚХА жанындағы волонтерлер орталығының мүшелері, «Tarbie» спорттық волонтерлік бағытының өкілдері, «Қайсар» клубының ойыншылары, спортшылар, жаттықтырушылар қатысты.

Әлеуметтік осал топ балаларын спортқа баулу мақсатында өткен шарада «Қайсар» футбол клубының ойыншылары Елдос Ахметов, Думан Нәрзілдаев сайысқа қатысушылармен кездесіп, оларға сәттілік тілеп, қолтаңбалары қойылған доптарды сыйға тарту етті.

«Қайсар» футбол клубының ойыншысы Елдос Ахметов «Мен сіздердей кезімде космонавт болғым келді, бірақ өскенде футболшы болдым. Армандар орындалу үшін алға үлкен мақсат қою керек. Мақсатқа жету үшін тынымсыз еңбек керек. Қазақстан халқы Ассамблеясының 25 жылдығы мен республикалық акцияға орай ұйымдастырылған салауаттылықты насихаттайтын шарада баршаңызға жеңіс тілеймін», деді.

Сайыс басталмас бұрын волонтерлер мен балалар үйінің тәрбиеленушілері флешмоб ұйымдастырды. Қыздар мен жігіттер өзара топтасып, би сайысына түсті.

Жасөспірімдерді спортқа баулу арқылы салауатты өмір салтына деген ынтасын арттыру, рухани даму және жақындарына құрмет көрсету, елде спорттық ортаны дамытуды көздеген шарада балалар ауылының тәрбиеленушілері көңілді спорттың бірнеше бағыты бойынша жарысқа түсті.

Белсенділік танытып, оқ бойы озып шыққан мықтыларға диплом мен естелік сыйлықтар табыс етілді.

Кейін қарай