Қызылорда облысы әкімдігінің мәжіліс залында өңірлік Қазақстан халқы Ассамблеясы активінің қорытынды отырысы болып өтті. Оған облыс әкімінің орынбасары Серік Ахмет, этномәдени бірлестіктің жетекшілері, облыстық Ассамблея құрылымдарының басшылары және қоғамдық келісім мен жалпыұлттық бірлікті нығайту бағытында елеулі үлесі бар жандар қатысты.

Қазақстан халқы Ассамблеясының 25 жылдығы аясындағы басқосудың модераторы Серік Ахмет елдегі достық пен азаматтық бейбітшілікті сақтауда ерекше рөл атқарған Ассамблеясының маңыздылығына тоқталып өтті.

«Өз тарихының 25 жылы ішінде Ассамблея конституциялық мәртебесі бар қоғамдық-саяси институтқа, мемлекеттің саяси жүйесінің маңызды құрамдас бөлігіне айналды. Ол өзінің маңыздылығы мен қажеттілігін тұрақты негізде растайды. Облыстық Ассамблея жыл басынан бері облыс бойынша 318 іс-шара ұйымдастырды, оның ішінде Қызылорда қаласында-137 іс-шара, аудан орталықтарында және Байқоңыр қаласында-181 іс-шара, онда 17 мыңнан астам онлайн-аудитория қамтылды. Ассамблеяның бастамасымен 5 мыңға жуық медициналық маскалар таратылды, облыстық жұқпалы аурулар ауруханасына арналған ӨЖЖ аппараты сатып алынды, «Мың алғыс!» акциясында 2 мың медицина қызметкеріне 14 млн.теңге көлемінде көмек көрсетілді»,- дей келе облыстық Ассамблеяның барлық мүшелеріне, этномәдени бірлестіктердің басшыларына риясыз және игілікті еңбектері үшін шынайы алғысын білдірді.

Келелі басқосуда Ассамблея қызметі, өңірдегі қоғамдық келісім мен жалпыұлттық бірлікті нығайту бағытындағы жұмыстар төңірегінде қалалық Қоғамдық келісім кеңесінің төрағасы Сайлаубай Әбішев, неміс этномәдени бірлестігінің жетекшісі Ирина Шек, «Қазақстан корейлері қауымдастығы» облыстық қоғамдық бірлестігі төрағасының орынбасары Юрий Ким сөз қозғады.

Жиында талқыланған мәселелерге сәйкес бірлік пен келісімнің әлеуметтік капиталын нығайту, этникалық мәселені саясиландыруға жол бермеу, этносаралық негіздегі кез келген жанжалды бейтараптандыру ниетінде бірқатар міндеттер белгіленді. Облыс әкімінің орынбасары С. Ахмет аталған міндеттердің орындалуы облыстық Ассамблеяның жұмысын жаңа деңгейге көтеретініне сенім білдірді. Сондай-ақ бірлік пен тұрақтылықты ілгері дамыту жолында елеулі еңбегі сіңген жандарға Ассамблеяның «Бірлік» алтын медалі, Құрмет грамотасы, «Қазақстан халқы Ассамблеясына 25 жыл» мерекелік медалін және облыс әкімінің құттықтауын табыстады.

Кейін қарай