1 желтоқсан – ҚР Тұңғыш Президенті күніне орай Қызылорда облысы әкімдігінің бастамасымен, облыстық Қазақстан халқы Ассамблеясы және «Рухани жаңғыру» орталығының ұйымдастыруымен Достық үйінде​ республикалық ғылыми-тәжірибелік конференция өтті.

«Тұңғыш Президент және Тәуелсіз Қазақстан: Тарих. Бүгін. Болашақ» атты тақырыбындағы тағылымы мол шараға облыс әкімінің орынбасары Серік Ахмет,​ ҚР Парламенті Мәжілісінің депутаты Наталья Жұмаділдаева (онлайн), әл-Фараби атындағы Қазақ Ұлттық университетінің профессоры, тарих ғылымдарының докторы Берекет Кәрібаев,​ облыстық мәслихат хатшысы, академик Қылышбай Бисенов,​ Ә. Тәжібаев атындағы облыстық әмбебап ғылыми кітапханасының директоры, тарих ғылымдарының кандидаты Нұрлыбек Мыңжас, облыстық ардагерлер кеңесінің төрағасы Серік Дүйсенбаев, жоғары оқу орындарының басшылары мен ғалымдары, басқарма басшылары, саяси партиялар мен үкіметтік емес ұйым өкілдері, қала және аудандардағы зиялы қауым өкілдері қатысты.

Конференция модераторы, облыс әкімінің орынбасары С.Ахмет қатысушыларды ҚР Тұңғыш Президенті күнімен құттықтап, конференция жұмысының маңыздылығын атап өтті. Серік Әбжәліұлы өзінің алғы сөзінде:

- Тұңғыш Президентіміздің тарихи тұлғасымен бірге айтылып, ажырағысыз ұғым ретінде бекіген Тәуелсіздік, Ядросыз қарусыз әлем, Қазақстан халқы Ассамблеясы, Елорда қатарын «Сыр-Алаштың анасы» максимасы толықтыра түседі. Бүгінде бұл сөз жерлестеріміздің мәртебесі мен һәм рухын көтеретін ұранға айналды. Елбасы тәуелсіздіктің алғашқы күндерінен сақтардың, оғыздар мен қыпшақтардың, Ұлық Ұлыс пен Ақ Орданың және Қазақ хандығының туы тігіліп, 1925 жылы Қазақ Республикасының астанасы ретінде ұлтымыздың тарихи атауын қайтарған Сыр өңіріне қолдауы ерекше, - деп Тұңғыш Президентіміздің аймаққа деген ыстық ықыласын білдірді.

Конференцияға онлайн байланыс арқылы Нұр-Сұлтан қаласынан ҚР Парламенті Мәжілісінің депутаты Наталья Жұмаділдаева қатысып, Елбасының Қазақстан халқы Ассамблеясын қалыптастырудағы жасампаз қызметін баяндап берді. Облыстық мәслихат хатшысы, академик Қылышбай Бисенов «Тәуелсіздік. Елбасы және Сыр өңірі», Әл-Фараби атындағы Қазақ ұлттық университетінің профессоры, тарих ғылымдарының докторы Берекет Кәрібаев «Тұңғыш Президент күні – мемлекеттілікке құрмет күні»,​ Ә. Тәжібаев атындағы облыстық әмбебап ғылыми кітапханасының директоры, тарих ғылымдарының кандидаты Нұрлыбек Мыңжас «Елбасы тәжірибесі: экзистенциализмнен гуманистік үдеріске ұмтылыс» тақырыптарында баяндамалар жасап, тұщымды ойларымен бөлісті.

Конференция жұмысы секциялық отырыстарда жалғасты. Бірінші секция «Елбасы және Қазақстан халқы Ассамблеясы: жасампаз 25 жыл», екінші секция «Тұңғыш Президент және Арал аймағы: экологиялық апаттан «Ғасыр жобасына», үшінші секция «Сыр Алаштың анасы: тарихи-мәдени сабақтастық» тақырыптарына арналды. Секциялық жұмыстардың нәтижесінде конференцияның қарары қабылданды.

Конференция аясында «Елбасы және Сыр елі» тарихи-деректі көрмесі ұйымдастырылды.

Кейін қарай