Қызылордада Қазақстан халқы ассамблеясының қолдауымен ҚР Президентінің жанындағы Мемлекеттік басқару академиясының Орталық Азия өңіріндегі этносаралық және конфессияаралық қатынастарды зерттеу орталығының ұйымдастыруымен «Қазақстан халқы Ассамблеясы: миссиясы, міндеттері мен тетіктері» тақырыбында өңірлік семинар-тренинг өтуде.

Семинарды Қызылорда облысы әкімінің орынбасары Наурызбай Байқадамов алғы сөзбен ашты.

Өңірлік семинар-тренинг барысында Қазақстан Республикасының Президенті Қасым-Жомарт Тоқаевтің Қазақстан халқына арнаған Жолдауы, Елбасы Нұрсұлтан Назарбаевтың «Болашаққа бағдар: рухани жаңғыру», «Ұлы даланың жеті қыры» бағдарламалық мақалаларының шеңберінде айқындалған жалпыұлттық бірлік пен бірегейлікті қалыптастыру бойынша міндеттердің мәнін ашып көрсету; Қазақстан халқы Ассамблеясының қоғамдық сананы жаңғырту, қоғамдық келісім мен жалпыұлттық бірлікті қамтамасыз ету бойынша мемлекеттік саясатты іске асырудағы миссиясы, міндеттері мен тетіктерін айқындау; ұлттың рухани жаңғыруы, сананың ашықтығы мен толерантты іскерлік қарым-қатынас қалыптастыруды азаматтардың бәсекеге қабілеттілігін дамытудың негізі ретінде зерделеу; полиэтникалық қоғамда инклюзивті әдістерді қолдану ерекшеліктерін қарастыру; қоғамдық және этносаралық келісім мәселелері бойынша тәжірибе және пікір алмасулар өтуде.       

Семинар-тренинг жұмысына лекторлар мен тренерлер ретінде Қазақстан халқы Ассамблеясы өкілдері, Орталық Азия өңіріндегі этносаралық және конфессияаралық қатынастарды зерттеу орталығының мамандары, отандық ғалымдар мен сарапшылар қатысуда.

Семинар-тренингтің негізгі аудиториясы - Қызылорда, Жамбыл, Алматы, Түркістан облыстары және Алматы, Қызылорда қалаларының этносаралық және конфессияаралық қатынастар мәселелерімен айналысатын мемлекеттік қызметшілері, құқық қорғау органдарының қызметкерлері, өңірлердегі ҚХА хатшылықтары мен «Қоғамдық келісім» өңірлік мекемелерінің мамандары, этномәдени бірлестіктерінің өкілдері.