Жаңа жыл уақыты жарқын оқиғаларға толы мезгіл. Осыған сәйкес айналадағы түрлі-түсті шамдармен безендірілген шыршалар да оған сән беріп, ғажайып шақты толықтырып тұрғандай. Мұндай уақытта барлық адамзатты бақытты күйде көргің келеді, әсіресе, балақайлардың балбұл жайнаған жүздерінен ерекше қуаныш көру – зор ғанибет. Бәлкім, сондықтан да болар, жаңа жылдық қайырымдылық іс-шараларын өткізу де Жамбыл облысының этномәдени бірлестіктері үшін игілікті дәстүрге айналған.

Мәселен, 2023 жылғы 5 қаңтарда Тараз қаласында ата-анасының қамқорлығынсыз қалған балаларға, өмірлік қиын жағдайға тап болған балаларды қолдау орталығының тәрбиеленушілеріне арналып дәстүрлі жаңа жылдық қайырымдылық мерекесі өтті. Оны Жамбыл облыстық «Ахыска» түрік этномәдени орталығы ҚБ ұйымдастырды.

Іс-шараға 80-нен астам кішкентай қатысушылар шақырылып, балалар уақыттарының бір бөлігін көтеріңкі жаңажылдық көңіл-күйде өткізуге арнады. Аяз Ата мен Ақшақардың қатысуымен кішкентай қонақтар үшін жарқын және қызықты ойындарға толы бағдарлама дайындалды. Бұған қоса, оларға ертегілерден көз тартар қызықты қойылымдар ұсынылып, сиқыр мен ертегі сияқты таңғажайып көңілді әлемге еніп, әр бала бір сәтке өздерін сол әлемнің кейіпкері сезінуіне мүмкіндік алды. Сонымен қатар, мерекеге келгендер би билеп, ән айтып, өлең оқыды.

Мерекелік іс-шара мол дастарханға ұласып, қатысушылар дәмді тағамдар мен тәттілерден ауыз тиді.

Іс-шара соңында балаларға жаңа жылдық сыйлықтар таратылды.

Кейін қарай