Маңғыстау облыстық Қазақстан халқы Ассамблеясы «Бекет ата» орталық мешітінде өткен Наурыз мейрамын тойлауға қатысты.

Салтанатты шараны облыстық «Бекет ата» мешітінің бас имамы Елжанов Әнуар ашып, барша жамағатқа амандық, бақ-береке, зор денсаулық, дүниенің тыныштығын тіледі.

Мешіт аумағына киіз үйлер орнатылып, онда этномәдени бірлестіктердің өкілдері, Қазақстан халқы Ассамблеясының мүшелері, МО ІСБ «Қоғамдық келісім» КММ қызметкерлері және «Ақтаулық мейрімділер клубы» еріктілер қозғалысының мүшелері дастархан жайды. Мерекелік дастарқанға қала тұрғындары, ақсақалдар, қаланың құрметті азаматтары, аз қамтылған отбасылар шақырылды.

Шара қонақтары «Қазақша күрес», «Көл күрес», «Арқан тарту» сынды сайыстарға белсенді қатысты. Киіз үйлердің бірінде қыз-келіншектер қазақ халқының ұлттық салт-дәстүрлерінен театрландырылған көрініс қойып, сәбиге «азан шақыру», сондай-ақ «бесікке салу» рәсімін жасады.

Әзірбайжан, қырғыз, өзбек этномәдени бірлестіктері жүз келіден астам палау әзірледі. Қонақтар мерекелік дастарханда дайындалған үш түрлі палау, ыстық бауырсақ, шұбат пен тағы басқа тағамдардан дәм татты.

Кейін қарай