Бүгін Шымкент қалалық татар-башқұрт этномәдени бірлестігінің белсенділері Қазақстан халқы Ассамблеясының 30 жылдығына орай «30 қайырымды іс» акциясы аясында қалалық жұмыспен қамту және әлеуметтік қорғау басқармасына қарасты «№6 балалар арнаулы әлеуметтік қызметтер көрсету орталығында» ерекше қажеттіліктері бар балаларға сыйлықтар табыстады.

№6 балалар арнаулы әлеуметтік қызметтер көрсету орталығында 18 жасқа дейінгі психоневрологиялық ауруы бар мүгедек балаларға арнаулы әлеуметтік қызметтер көрсетіледі. Бұл орталықтың қызметкерлері балаларға қажетті психологиялық, физикалық және әлеуметтік көмек көрсетуге зор күш-жігерін жұмсап, олардың қоғаммен үйлесімді өмір сүруіне жағдай жасауда.

Мұндай қайырымдылық шаралары қоғамда мейірімділік пен жанашырлықтың нығаюына, сондай-ақ әлеуметтік топтарға көмек көрсету арқылы қоғамдағы бірлікті арттыруға ықпал етеді.

Айта кетейік, Қазақстан халқы Ассамблеясының 30 жылдығына орай өткізілген «30 қайырымды іс» акциясы Шымкент қаласындағы этномәдени бірлестіктердің бастамасымен жүзеге асырылуда. Акция аясында түрлі бағытты қамтыған игі істерді атқару көзделіп отыр. Алдағы уақытта осындай қайырымдылық бағытындағы іс-шаралар тұрақты түрде өткізіліп, қоғамда мейірімділік пен ізгілік құндылықтарын нығайтуға ықпал ететіні анық.

Кейін қарай