Қазақстан халқы Ассамблеясы

23 Қазан, 2020

831

«Қазақ тілін үйреткен ата-әжеме алғысым шексіз»

ҚХА ұйымдастыруымен Алматы қаласы Достық үйінде өткен «Ұлы Даланың ұлтаралық тілі» атты бірінші республикалық конгресінде сөз сөйлеген Алматы облысы Іле ауданы, № 18 Қараой орта мектебінің мұғалімі Валентина Талюс, мектепте орыс тілінде оқыса да, қазақ тілін үйрену қиынға соқпағанын айтты.

- Мен Талюс Валентина Ионасқызы. Ұлтым литовка, бірақ өзге ұлт болсам да, біздің мемлекеттік тілімізді меңгеріп және құрметтеп келемін. Мен 1994 жылы Ресейдегі Астарахань қаласында дүниеге келдім. Бір жасқа толмай біз отбасымызбен бірге Атырау облысындағы, Ганюшкино атты ауылға ата-әжемнің үйіне көшіп келдік. Содан бері мен атам Хасанбек және әжем Нинаның қолында, тәрбисінде болдым. Атам мені кішкентай кезімнен қазақша сөйлеуді үйретті, сонымен қатар бірге жүрген достарымнан және көршілерімнен үйренгенмін. Бес жасымнан бастап қазақ тілінде сөйлей бастадым. Мемлекеттік тіліміз менің өмірімде ерекше орын алады. Мектепті және жоғары оқу орнымды орыс тілінде бітірсем де, мен мемлекеттік тілге байланысты әртүрлі олимпиада, сайыстарына қатысып, жүлделі орындарды алып жүрдім. Қазіргі таңда мен білім саласында, Алматы облысы Іле ауданының мектебінде педагог-психолог болып жұмыс істеймін. Қазақ тілін білу балалармен тіл табысуыма көмектеседі. Мені қазақ ұлтына, қазақ тіліне құрмет қарауды үйреткені үшін ата-әжеме шексіз ризамын.

Менің ойымша мемлекеттік тіл - тек қазақтың тілі емес, Қазақстанда тұратын барлық ұлтардың ұлтаралық ортақ тілі болуға тиіс деп ойлаймын.


Кейін қарай