Жамбыл облысы ҚХА Аналар кеңесі отбасылық құндылықтарды дамыту және насихаттау, отбасы мәртебесін арттыру, құқықтық сауаттылық деңгейін жетілдіру бойынша ақпараттық-кеңестер өткізіп, қоғамдық маңызды шараларды ұйымдастырып келеді.

Осы бағытта Аналар кеңесі «Бақытты отбасы» орталығында некені бұзу туралы істерді сотқа дейін реттеу шарасына қатысып, аталған мәселе бойынша жүгінген он отбасының арызын қарастырды. Нәтижесінде мәселесі терең деп табылған алты отбасының екеуі сақталып, екеуіне өзара мәмлеге уақыт берілсе, некесі бұзылған екі отбасында балалардың құқығын қорғау ұсынылды. Сондай-ақ, Аналар кеңесінің жетекшісі Мухабат Миражапова мен кеңес мүшелері Аракси Плетнева және Роза Изъятова Байзақ ауданында тағы бір отбасын сақтау мақсатында кеңес беріп, түсіндіру жұмыстарын жүргізіп қайтты.

Жамбыл облыстық ҚХА Аналар кеңесі атқарған ауқымды жұмыстардың басым бөлігі отбасын сақтап қалу сынды қоғамда маңызды мәселеге айналған түйіткілдерді шешуге арналып келеді. Бірлік пен берекені сақтап, отбасын ұйыта алғандық Отанға да пайдалы болары сөзсіз деп білетін Аналар кеңесінің мүшелері алға қойған жоспарлар да жүйелі. Еліміздің бейбітшілігін, отбасылардың беріктігін сақтауда ҚХА Аналары мен барша аналардың арқалаған жүгі ауыр.

Жамбыл облысы әкімдігі ІСБ

Қоғамдық келісім» КММ

Баспасөз қызметі орталығы

Кейін қарай