Қашанда қадір тұтып, төрге іліп, қастерлеген қазақтың қара домбырасын қарағандылық жас өнерпаз Кристина Осуховская жанына серік етіп келеді.

Музыка тілі барша әлемге ортақ. Қазақ жеріне табан тіреген кез-келген өзге ұлт өкілінің назары бірінші домбыраға ауатыны анық. Сондай қызығушылығы ерте жасында оянған Кристина қазірде қазақтың қара домбырасының құлағында ойнайды. Ол осы өнерімен талай байқауларда жүлделі орындарды иеленіп үлгерген.

Үшінші сыныптан бастап, Саран қаласының өнер мектебінде білім алады. Ұстазы Гүлмира Абжатова домбыра шертудің қыр-сырын үйреткен. Қристина қзіргі таңда Тілендиев, Құрманғазы, Момбеков, Ахмедьяров сынды композиторлардың, тағы басқа авторлардың туындыларын қосқанда 30-қа жуық күй біледі екен. Салалы саусақтары домбыра пернесінің бойымен жүйткігенде тыңдаушының жүрегінің қыл пернесін қозғайды. Аспапты жіті меңгерген. Болашақта Кристина білімін жетілдіріп, домбыра шертуді тастамайтынын айтады.

Осы дәрежеге жетуіне жол сілтеп, септігін тигізген жоғарыда аталған ұстазына алғысын білдіреді. Олардың еңбегі зор екендігін атап өтпеске болмас.

Осындай асыл қазынамызды жаңғыртып, өскелең ұрпақ санасына сіңіру мақсатында шілде айының алғашқы жексенбісі Ұлттық домбыра күні ретінде белгіленген болатын. Бұл киелі аспаптың дәрежесін одан әрі асқақтата түскендей.

Кейін қарай